ഇന്ത്യൻ മഹാസമുദ്രത്തിൽ കേരളത്തിനു തെക്കുവശത്തായി പുരാതന സമുദ്രത്തിൻ്റെ അടയാളങ്ങൾ കണ്ടെത്തിയതായി ഗവേഷകർ. സമുദ്രത്തിൽ കേരളത്തിനും ശ്രീലങ്കയ്ക്കും തെക്കുവശത്തായി വലിയ ഗ്രാവിറ്റി ഹോൾ കണ്ടെത്തിയെന്നും ഇത് പുരാതനകാലത്ത് നിലനിന്നിരുന്ന സമുദ്രത്തിൻ്റെ അടയാളമാണെന്നുമാണ് പുതിയൊരു പഠനത്തിൽ വ്യക്തമാക്കുന്നത്. ഭൂമിയുടെ ഗുരുത്വാകർഷണത്തിൽ നിലവിലുള്ള ഏറ്റവും വലിയ അപാകതയാണ് ഇതെന്നാണ് ഗവേഷകർ പറയുന്നത്.
സമുദ്രത്തിൻ്റെ അടിത്തട്ടിലാണ് കിലോമീറ്ററുകളോളം പരന്നുകിടക്കുന്ന ഗുരുത്വാകർഷണം കുറവുള്ള മേഖല കണ്ടെത്തിയത്. ഇന്ത്യൻ ഓഷ്യൻ ജിയോയിഡ് ലോ എന്നാണ് ഈ പ്രദേശത്തെ ഗവേഷകർ വിളിക്കുന്നത്. ലക്ഷക്കണക്കിനു വർഷങ്ങൾക്കു മുൻപ് ഇല്ലാതായ ടിഥിസ് സമുദ്രത്തിൻ്റെ അവശേഷിപ്പുകളാണ് ഗുരുത്വബലത്തിലുള്ള ഈ വ്യതിയാനങ്ങളെന്നാണ് സയൻ്റിഫിക് അമേരിക്കൻ മാസികയിൽ പ്രസിദ്ധീകരിച്ച ലേഖനത്തിൽ പറയുന്നത്. സമുദ്രത്തിൻ്റെ അടിത്തട്ടിൽ ഈ ഭാഗം നിർമിക്കപ്പെട്ടിരിക്കുന്നത് പുരാതനസമുദ്രം നിലകൊണ്ട പ്ലേറ്റുകളിലാണ് എന്നാണ് ലേഖനത്തിൽ പറയുന്നത്. 20 ലക്ഷം സ്ക്വയർമൈലിൽ അധികമാണ് ഈ പ്രദേശത്തിൻ്റെ വലുപ്പം. ഭൂവൽക്കത്തിൽനിന്ന് 1000 കിലോമീറ്ററോളം അടിയിൽവരെ ഈ പ്ലേറ്റുകൾ വ്യാപിച്ചുകിടക്കുന്നുണ്ടെന്നും പഠനത്തിൽ വ്യക്തമാക്കുന്നു.
ഈ ടിഥിയൻ സ്ലാബുകൾ ആഫ്രിക്കൻ ബ്ലോബ് എന്നറിയപ്പെടുന്ന ആഫ്രിക്കൻ ലോ ഷിയർ വെലോസിറ്റി പ്രൊവിൻസിൽ ഉണ്ടാക്കുന്ന സമ്മർദ്ദമാണ് ഇന്ത്യൻ സഹാസമുദ്രത്തിൻ്റെ അടിത്തട്ടിലുണ്ടാകുന്ന മാറ്റങ്ങൾക്കും കാരണമാകുന്നതെന്നും ഗവേഷകരായ ദേബാഞ്ജൻ പാലും ആത്രേയീ ഘോഷും വ്യക്തമാക്കുന്നു. ഇതാദ്യമായാണ് ഇന്ത്യൻ മഹാസമുദ്രത്തിലെ ജിയോയിഡ് ലോയുടെ കാരണം വ്യക്തമാകുന്നത്.
ഈ മേഖലയെപ്പറ്റി മുൻപ് നിരവധി പഠനങ്ങൾ നടന്നിട്ടുണ്ടെങ്കിലും ഇത്തരത്തിൽ ഗുരുത്വാകർഷണത്തിൽ വ്യതിയാനമുള്ള മേഖല ഉണ്ടായതെങ്ങനെയെന്ന് അധികമാരും പഠിച്ചിരുന്നില്ല. എന്നാൽ ഈ പ്രതിഭാസത്തിനു പുരാതനസമുദ്രമായ ടിഥിസുമായുള്ള ബന്ധം പുതിയ പഠനത്തിലൂടെ വ്യക്തമാകുകയായിരുന്നു. കോടിക്കണക്കിനു വർഷങ്ങൾക്കു മുൻപ് നിലനിന്നിരുന്ന ഗോണ്ട്വാന, ലോറേഷ്യ എന്നീ ഭൂഖണ്ഡങ്ങൾ തമ്മിൽ വേർപിരിഞ്ഞപ്പോഴാണ് ടിഥിസ് സമുദ്രം രൂപപ്പെട്ടത് എന്നാണ് പഠനങ്ങൾ സൂചിപ്പിക്കുന്നത്. കംപ്യൂട്ടർ മോഡലുകളെ അടിസ്ഥാനമാക്കിയാണ് പുതിയ നിഗമനത്തിൽ ഗവേഷകർ എത്തിയത്.
ഇന്ത്യൻ മഹാസമുദ്രത്തിലെ ജിയോയിഡ് ലോ മേഖലയെക്കുറിച്ച് കൂടുതൽ മനസ്സിലാക്കാൻ പഠനം സഹായിക്കുമെന്ന് ജിയോഫിസിസിസ്റ്റായ ഷീജെ ഷോങ് വ്യക്തമാക്കി. അതേസമയം, ആഫ്രിക്കയിലും പസഫിക് സമുദ്രത്തിലുമുള്ള പോസിറ്റീവ് ഗ്രാവിറ്റി അപാകതകളക്കുറിച്ചും പഠിക്കേണ്ടതുണ്ടെന്നും അദ്ദേഹം ചൂണ്ടിക്കാട്ടി. ഇന്ത്യൻ മഹാസമുദ്രത്തിലെ ഗ്രാവിറ്റി ഹോൾ രണ്ടുകോടി വർഷം മുൻപാണ് രൂപപ്പെട്ടതെന്നും ഇനിയും ലക്ഷക്കണക്കിനു വർഷം ഇവ നിലനിൽക്കുമെന്നും അദ്ദേഹം ചൂണ്ടിക്കാട്ടി.
Post a Comment