വിവാഹം എന്നത് ജീവിതത്തിലെ ഒരു സുപ്രധാന തീരുമാനമാണ്. വളരെ സൂക്ഷ്മതയോടെ എടുക്കേണ്ട തീരുമാനം. പണ്ടൊക്കെ കുടുംബത്തിലെ മുതിർന്നവരുടെ തീരുമാനത്തിനനുസരിച്ചായിരുന്നു വിവാഹമെങ്കിൽ, ഇന്ന് അതൊക്കെ മാറി. ദാമ്പത്യം ആരംഭിച്ച് കഴിയുമ്പോൾ പങ്കാളിയെ സന്തോഷിപ്പിക്കാൻ സ്വന്തം സന്തോഷങ്ങളും ആഗ്രഹങ്ങളുമൊക്കെ വേണ്ടെന്ന് വെച്ചിരുന്ന കാലവും മാറി. വിവാഹത്തിന് തയ്യാറെടുക്കുന്ന ഇന്നത്തെ തലമുറയ്ക്ക് സ്വന്തമായി നിലപാടുകളും വ്യക്തമായ ജീവിത കാഴ്ചപ്പാടുകളുമൊക്കെയുണ്ട്. സ്വന്തം ആഗ്രഹങ്ങളും സ്വപ്നങ്ങളുമൊക്കെ ഇരുകൂട്ടർക്കും ഉണ്ടാകും. ഇതൊക്കെ വിവാഹത്തിന് മുമ്പ് തന്നെ പരസ്പരം സംസാരിക്കേണ്ട കാര്യങ്ങളാണ്. ഇവ കൂടാതെ വിവാഹത്തിന് മുമ്പ് തന്നെ നിങ്ങൾ നിർബന്ധമായും അറിഞ്ഞിരിക്കേണ്ട ചില കാര്യങ്ങളുണ്ട്.
ദാമ്പത്യത്തിലെ പ്രശ്നങ്ങൾ ഒഴിവാക്കാൻ വിവാഹത്തിന് മുമ്പ് ഇനി പറയുന്ന കാര്യങ്ങളെ കുറിച്ച് രണ്ടുപേർക്കും വ്യക്തമായ ധാരണ ഉണ്ടാകേണ്ടത് പ്രധാനമാണ്:
നിങ്ങൾ പിന്തുടരുന്ന മൂല്യങ്ങൾ, ഇഷ്ടങ്ങൾ, നിങ്ങളുടെ ആഗ്രഹങ്ങളും ലക്ഷ്യങ്ങളും, തുടങ്ങിയവയുടെ ഒക്കെ അടിസ്ഥാനത്തിൽ നിങ്ങളും പങ്കാളിയും തമ്മിലുള്ള പൊരുത്തം എത്രത്തോളമുണ്ടെന്ന് മനസിലാക്കുക. രണ്ടുപേർക്കും അവരുടേതായ ആഗ്രഹങ്ങൾ ഉണ്ടാകും. അതായത് വിവാഹശേഷം ചെയ്യേണ്ട കാര്യങ്ങൾ, പോകേണ്ട സ്ഥലങ്ങൾ എന്നിങ്ങനെ. നിങ്ങളുടെ ആഗ്രഹങ്ങൾ ആയിരിക്കില്ല പങ്കാളിയുടേത്. ഒരുപക്ഷെ നിങ്ങളുടേതിനേക്കാൾ തീർത്തും വ്യത്യസ്തമായ ആഗ്രഹങ്ങൾ ആണെങ്കിലോ? ഒരാളുടെ ആഗ്രഹങ്ങൾ മാത്രമാണ് നടപ്പിലാകുന്നതെങ്കിലോ? അതുകൊണ്ട് ഇത്തരം കാര്യങ്ങളെ കുറിച്ച് വ്യക്തമായി മനസിലാക്കണം.
പലരുടെയും നിർബന്ധത്തിന് വഴങ്ങി കല്യാണം കഴിച്ച് പിന്നീട് പല പ്രശ്നങ്ങളും നേരിടുന്നവർ നമുക്കിടയിൽ ധാരാളമുണ്ട്. ആരുടെയെങ്കിലും സമ്മർദ്ദത്തിന് വഴങ്ങിയാണോ കല്യാണത്തിന് സമ്മതിച്ചത് എന്ന് ചോദിച്ചറിയുക. വിവാഹത്തിന് നിങ്ങളെ പോലെ തന്നെ മറ്റേ വ്യക്തിയും മാനസികമായി തയ്യാറാണോ എന്ന് മനസിലാക്കുക. വിവാഹശേഷം ഉണ്ടാകുന്ന ഉത്തരവാദിത്തങ്ങളും ചുമതലകളുമൊക്കെ ഏറ്റെടുക്കാൻ മാനസികമായി തയ്യാറെടുത്തിട്ടുണ്ടോ എന്ന് അറിയുക.
നിങ്ങളുടെ സാമ്പത്തിക സ്ഥിതി വിവാഹത്തിന് മുമ്പ് തന്നെ പങ്കാളിയോട് തുറന്ന് സംസാരിക്കേണ്ടത് പ്രധാനമാണ്. കൂടാതെ പങ്കാളിയുടെ സാമ്പത്തിക സ്ഥിതിയും അറിഞ്ഞിരിക്കുക. ലോൺ, കടങ്ങൾ ഇവയൊക്കെ ഉണ്ടോ എന്ന് ആദ്യമേ തന്നെ അറിഞ്ഞിരിക്കുന്നത് ദാമ്പത്യത്തിൽ പിന്നീട് ഉണ്ടാകുന്ന പല പ്രശ്നങ്ങളും ഒഴിവാക്കാൻ സഹായിക്കും. കൂടാതെ ബില്ലുകൾ പോലെ സ്ഥിരമായുണ്ടാകുന്ന മറ്റ് ചെലവുകൾ കുറിച്ചും അറിഞ്ഞിരിക്കുന്നത് വിവാഹശേഷം സമ്പത്ത് ഏതൊക്കെ രീതിയിൽ വിനിയോഗിക്കണമെന്ന് മനസിലാക്കാൻ നിങ്ങളെ പ്രാപ്തരാക്കും.
വിവാഹ ശേഷം കുഞ്ഞുങ്ങൾ വേണമോ എന്നത് ഇരുകൂട്ടരും ഒന്നിച്ചെടുക്കേണ്ട തീരുമാനമാണ്. ഒരാൾക്ക് കുട്ടി വേണമെന്നും മറ്റേ ആൾക്ക് വേണ്ട എന്നുമാണ് എങ്കിൽ ദാമ്പത്യത്തിൽ വലിയ പ്രശ്നങ്ങൾക്കാണ് തുടക്കമിടുന്നത്. ഇനി കുട്ടികൾ വേണമെന്നാണ് തീരുമാനമെങ്കിൽ എത്ര കുട്ടികൾ വേണം, വിവാഹശേഷം എത്ര നാൾ കഴിഞ്ഞ് കുട്ടിക്കായി പ്ലാൻ ചെയ്യണം തുടങ്ങിയ കാര്യങ്ങൾക്ക് ആദ്യം തന്നെ വ്യക്തത വരുത്തണം. കൂടാതെ കുട്ടികളിൽ വളർത്തിയെടുക്കേണ്ട മൂല്യങ്ങൾ, അവരുടെ വിശ്വാസം തുടങ്ങിയവയെല്ലാം തുറന്ന് സംസാരിക്കേണ്ടതാണ്, പ്രത്യേകിച്ച് നിങ്ങൾ ഇരുമതസ്ഥരാണെങ്കിൽ.
നിങ്ങൾ ആരോഗ്യപരമായ എന്തെങ്കിലും പ്രശ്നങ്ങൾ നേരിടുന്നുണ്ടെങ്കിൽ അതേകുറിച്ച് വിവാഹത്തിന് മുമ്പ് തന്നെ വ്യക്തമായി മനസിലാക്കിയിരിക്കണം. കൂടാതെ പങ്കാളിയാകാൻ പോകുന്ന ആളുടെ ആരോഗ്യ സ്ഥിതിയും മനസിലാക്കുക. മരുന്നുകൾ കഴിക്കുന്നുണ്ടെങ്കിൽ അതിനെ കുറിച്ചും തുറന്ന് സംസാരിക്കുക. കുടുംബത്തിലെ ആർക്കെങ്കിലും ആരോഗ്യ പ്രശ്നങ്ങൾ ഉണ്ടെങ്കിൽ അതേക്കുറിച്ചും സംസാരിക്കുന്നത്, ഇത്തരം കാര്യങ്ങൾ വിവാഹശേഷം അറിഞ്ഞ് പ്രശ്ങ്ങളിലേയ്ക്ക് പോകുന്നത് ഒഴിവാക്കാം. കൂടാതെ എന്തെങ്കിലും മാനസികാഘാതം നേരിട്ടിട്ടുണ്ടോ, മാനസികമായി തകർന്നുപോയ അവസ്ഥകൾ ഉണ്ടായിട്ടുണ്ടോ, എന്നൊക്കെ അറിയുന്നതും നന്നായിരിക്കും.
പഠനത്തിനിടയിൽ വിവാഹത്തിലേക്ക് നീങ്ങുന്ന ഒരുപാട് പേരുണ്ട്. തുടർന്നും പഠിക്കണമെന്ന് ആഗ്രഹമുണ്ടെങ്കിലും വിവാഹശേഷം പലർക്കും പഠനം തുടരാൻ കഴിയാറില്ല. അതുകൊണ്ട് പഠനം തുടരാനുള്ള തീരുമാനം ആദ്യം തന്നെ വ്യക്തമാക്കണം. വിവാഹശേഷം ജോലി കളയുന്ന (കളയാൻ നിർബന്ധിതരാകുന്ന) ധാരാളം സ്ത്രീകൾ നമുക്കിടയിലുണ്ട്. അതുകൊണ്ട് ഈ കാര്യവും ആദ്യം തന്നെ സംസാരിക്കണം. വിവാഹശേഷവും ജോലി ചെയ്യാൻ ആഗ്രഹിക്കുന്നെങ്കിൽ അതേകുറിച്ച് സംസാരിക്കുകയും തീരുമാനത്തിലെത്തുകയും ചെയ്യുക. വിവാഹശേഷം പഠിക്കാനോ ജോലി ചെയ്യാനോ പിന്തുണ നൽകാത്ത പങ്കാളിയോ കുടുംബമോ ആണ് നിങ്ങൾക്ക് കിട്ടുന്നതെങ്കിൽ അതും വലിയ പ്രശ്നങ്ങളിലേക്ക് നയിക്കും.
സാമൂഹിക രാഷ്ട്രീയ ചുറ്റുപാടുകളിൽ ജീവിക്കുന്ന നമുക്കെല്ലാം വ്യക്തമായ നിലപാടുകളും കാഴ്ചപ്പാടുകളുമുണ്ട്. ഇത്തരം കാഴ്ചപ്പാടുകൾക്ക് വിവാഹജീവിതത്തിലും വലിയൊരു പങ്കുണ്ട്. പൊരുത്തപ്പെടാനാകാത്ത രാഷ്ട്രീയ നിലപാടുകൾ ഉള്ളവരാണെങ്കിൽ തുടർന്നുള്ള ജീവിതത്തിലും വലിയ പ്രശ്നങ്ങൾ ഉണ്ടാകും. പലതും വഴക്കിലേക്കെത്തുകയും ചെയ്യും. അതിനാൽ വിവാഹത്തിന് മുമ്പ് തന്നെ രാഷ്ട്രീയ നിലപാടുകൾ സംസാരിക്കുക.
വിവാഹമോചനത്തിലേക്കും വിവാഹശേഷമുള്ള പ്രശ്നങ്ങളിലേക്കും പോകാതെ ഇരിക്കാൻ ഈ കാര്യങ്ങൾ ഒരു പരിധിവരെ നമ്മെ സഹായിക്കും.
Post a Comment