.jpg)
മഴക്കാലത്താണ് ഒട്ടുമിക്ക ആളുകള്‍ക്കും അലര്‍ജി വരുന്നത്. ചിലര്‍ക്ക് സ്‌കിന്‍ അലര്‍ജി ആയിരിക്കും. ചിലര്‍ക്ക് തണുപ്പ് തട്ടി തുമ്മല്‍ പോലെയുള്ള പ്രശ്‌നങ്ങളുമായിരിക്കും അലട്ടുക. എന്നാല്‍, ഇവ മാത്രമല്ല, സ്ത്രീകളില്‍ പിടികൂടാവുന്ന ഏറ്റവും പ്രശ്‌നം പിടിച്ച ഒരു അലര്‍ജിയുണ്ട്. യോനീ ഭാഗത്ത് ഉണ്ടാകുന്ന അലര്‍ജി. ഈ മഴക്കാലം ഇത്തരം അലര്‍ജികള്‍ സ്ത്രീകളില്‍ വര്‍ദ്ധിപ്പിക്കുന്നതിന് പ്രധാന കാരണമാണ്. ഇത്തരം അലര്‍ജി വരാതിരിക്കാന്‍ സ്ത്രീകള്‍ എന്തെല്ലാം കാര്യങ്ങള്‍ ശ്രദ്ധിക്കണം എന്ന് നോക്കാം.
മഴക്കാലത്ത് ഹ്യൂമിഡിറ്റി കൂടുതലായതിനാല്‍ തന്നെ അന്തരീക്ഷത്തില്‍ മോയ്‌സ്ച്വര്‍ കണ്ടന്റ് വളരെയധികം കൂടുതലായിരിക്കും. ഇത്തരം അന്തരീക്ഷത്തില്‍ ഇരിക്കുമ്പോള്‍ അത് സ്വകാര്യഭാഗത്ത് അണുബാധ ഉണ്ടാക്കുന്നതിലേയ്ക്ക് നയിക്കുന്നുണ്ട്. ഇത്തരം അവസ്ഥകള്‍ ഒഴിവാക്കാന്‍ പരമാവധി വ്യക്തിശുചിത്വം സൂക്ഷിക്കുന്നത് ഒരു പരിധിവരെ സഹായിക്കും.
യോനി എല്ലായ്‌പ്പോഴും കഴുകി വൃത്തിയാക്കി വെക്കാന്‍ സൂക്ഷിക്കണം. അതുപോലെ തന്നെ മണമില്ലാത്ത സോപ്പ് ഉപയോഗിച്ച് ഇടയ്ക്ക് അവിടെ കഴുകി വൃത്തിയാക്കുന്നത് നല്ലതാണ്. സോപ്പ് ഉപയോഗിക്കുമ്പോള്‍ വീര്യം കുറഞ്ഞ സോപ്പ് ആയിരിക്കാനും ശ്രദ്ധിക്കണം. അതുപോലെ, ചെറുചൂടുവെള്ളത്തില്‍ കഴുകി വൃത്തിയാക്കാന്‍ മറക്കരുത്. ഇത് അവിടത്തെ മണം കുറയ്ക്കാനും അതുപോലെ, അണുബാധ വരാതിരിക്കാനും വളരെയധികം സഹായിക്കും. എല്ലായെപ്പോഴും ഉണങ്ങി സൂക്ഷിക്കാൻ ശ്രദ്ധിക്കുക.
അടി വസ്ത്രങ്ങള്‍ തിരഞ്ഞെടുക്കുമ്പോള്‍ നല്ല കോട്ടന്‍ വസ്ത്രങ്ങള്‍ തിരഞ്ഞെടുക്കാവുന്നതാണ്. അല്ലങ്കില്‍ ചൂട് അധികം നില്‍ക്കാത്തതും നല്ലപോലെ വായുസഞ്ചാരം ലഭിക്കുന്നതുമായ ഫാബ്രിക് ഉള്ള അടിവസ്ത്രങ്ങള്‍ തിരഞ്ഞെടുക്കുന്നത് നല്ലതാണ്. അതുപോലെ, തന്നെ, നല്ലപോലെ ഇറുകി കിടക്കുന്ന വസ്ത്രങ്ങളും അടിവസ്ത്രങ്ങളും പരമാവധി ഒഴിവാക്കുന്നതാണ് നല്ലത്. ഇത്തരത്തില്‍ ഇറുകിയ വസ്ത്രങ്ങള്‍ ധരിച്ചാല്‍ അത് സ്വകാര്യഭാഗത്ത് ഈര്‍പ്പം കെട്ടികിടക്കുന്നതിലേയ്ക്കും ഇത് ഫംഗല്‍ അല്ലെങ്കില്‍ ബാക്ടീരിയല്‍ അണുബാധ ഉണ്ടാകുന്നതിലേയ്ക്കും നയിക്കുന്നു.
മഴക്കാലമായാല്‍ പലര്‍ക്കും വസ്ത്രങ്ങള്‍ ഉണക്കി എടുക്കാന്‍ ബുദ്ധിമുട്ടായിരിക്കും. ഇത്തരം അവസരത്തില്‍ പലരും ചെറിയ നനവുണ്ടെങ്കിലും അടിവസ്ത്രങ്ങള്‍ ഇട്ട് പോകുന്നത് കാണാം. ചിലര്‍ അത് അടുപ്പിൻറെ ചുവടെ ഇട്ട് ഉണക്കും. ചിലര്‍ ആണെങ്കില്‍ അയേണ്‍ ബോക്‌സ് ഉപയോഗിച്ച് തേച്ച് ഉണക്കുന്നതും കാണാം. എന്നാലും അതില്‍ നിന്നും വെള്ളത്തിന്റെ അംശം നന്നായി പോയിട്ടുണ്ടാവുകയില്ല.
ഇത്തരത്തില്‍ നനഞ്ഞ വസ്ത്രങ്ങളും അടിവസ്ത്രങ്ങളും ഉപയോഗിക്കുന്നത് യോനിഭാഗത്ത് അലര്‍ജി ഉണ്ടാകുന്നതിന് കാരണമാണ്. ഇവ ചൊറിച്ചില്‍ ഉണ്ടാക്കുകയും, ചിലര്‍ക്ക് അവിടെ തൊലി പോകുന്നതിന് കാരണമാവുകയും, ചിലര്‍ക്ക് കുരുക്കള്‍ പൊന്തിവരുന്നതിലേയ്ക്ക് നയിക്കുകയു ചെയ്യുന്നു. അതിനാല്‍, ഇത്തരം അവസ്ഥ ഒഴിവാക്കാന്‍ നനഞ്ഞ വസ്ത്രങ്ങള്‍ ഒഴിവാക്കാം. അതുപോലെ, നല്ലപോലെ ഉണങ്ങിയ വസ്ത്രങ്ങള്‍ മാത്രം ധരിക്കാന്‍ ശ്രദ്ധിക്കുന്നതും നല്ലതാണ്.
പലരും ചെയ്യുന്ന പ്രധാനപ്പെട്ട ഒരു തെറ്റാണ് യോനിഭാഗം തുടയ്ക്കുമ്പോള്‍ പുറകില്‍ നിന്നും മുന്‍ഭാഗത്തേയ്ക്കായി തുടയ്ക്കുന്നത്. അതുപോലെ, മലവിസര്‍ജനം കഴിയുമ്പോഴും കഴുകാന്‍ പലരും പുറകില്‍ നിന്നും മുന്‍ഭാഗത്തേയ്ക്കായിട്ടാണ് കഴുകുക. സത്യത്തില്‍ ഈ ശീലം അണുബാധ വര്‍ദ്ധിപ്പിക്കുകയാണ് ചെയ്യുന്നത്. അതിനാല്‍, എല്ലായ്‌പ്പോഴും അത് മൂത്രം ഒഴിച്ച് കഴിഞ്ഞ് കഴുകി തുടയ്ക്കുമ്പോള്‍ ആയാല്‍ പോലും മുന്‍ഭാഗത്തില്‍ നിന്നും പുറകിലേയ്ക്കായി തുടച്ചെടുക്കാന്‍ ശ്രദ്ധിക്കേണ്ടത് അനിവാര്യമാണ്. ഇല്ലെങ്കില്‍ മലദ്വാരത്തില്‍ നിന്നുള്ള അണുക്കള്‍ യോനിയിലേയ്ക്ക് പ്രവേശിക്കുന്നതിനും ഇത് പലതരം ആരോഗ്യ പ്രശ്‌നങ്ങളിലേയ്ക്കും നയിക്കാന്‍ സാധ്യത കൂടുതലാണ്.
മഴക്കാലമായതിനാല്‍ പലര്‍ക്കും അധികം വെള്ളം ദാഹിക്കില്ല. എന്നാല്‍, വെള്ളം ദാഹിച്ചില്ലെങ്കിലും ഇടവിട്ട് കുടിച്ച് കൊണ്ടിരിക്കണം. ഇല്ലെങ്കില്‍ ശരീരത്തില്‍ നിര്‍ജലീകരണം സംഭവിക്കാന്‍ സാധ്യത കൂടുതലാണ്. നിര്‍ജലീകരണം ഒഴിവാക്കുന്നതിനും യോനിഭാഗം ഹൈഡ്രേറ്റ് ചെയ്ത് നിലനിര്‍ത്തുന്നതിനും നന്നായി വെള്ളം കുടിക്കുന്നത് സഹായിക്കുന്നു.
മഴക്കാലത്തെ ആരോഗ്യ പ്രശ്‌നങ്ങളില്‍ നിന്നും രക്ഷനേടണമെങ്കില്‍ നമ്മളുടെ രോഗപ്രതിരോധശേഷി വര്‍ദ്ധിപ്പിക്കേണ്ടത് അനിവാര്യമാണ്. ഇതിനായി നല്ല ഹെല്‍ത്തി ആയിട്ടുള്ള ഡയറ്റ് പിന്തുടരാവുന്നതാണ്. അതുപോലെ, നന്നായി ഉറങ്ങുക. പിന്നെ, ചെറിയ രീതിയിലെങ്കിലും വ്യായാമം ചെയ്യാന്‍ ശീലിക്കുന്നത് നല്ലതാണ്.
നനഞ്ഞ സ്ഥലത്ത് പരമാവധി ഇരിക്കാതിരിക്കാന്‍ ശ്രദ്ധിക്കുക. ഇത്തരത്തില്‍ ഇരിക്കുന്നത് ശരീരത്തിലേയ്ക്ക് അണുബാധ കയറുന്നതിന് കാരണമാണ്. അതുപോലെ തന്നെ, സ്വകാര്യഭാഗത്തെ അണുബാധയിലേയ്ക്കും ഇത് നയിക്കുന്നു. നനഞ്ഞ വസ്ത്രങ്ങള്‍ എത്രയും പെട്ടെന്ന് മാറ്റാന്‍ സാധിക്കുമെങ്കില്‍ അതാണ് നല്ലത്. അതുപോലെ. എന്തെങ്കിലും അലര്‍ജി ശ്രദ്ധയില്‍ പെട്ടാല്‍ വെച്ചോണ്ടിരിക്കാതെ ഒരു ഡോക്ടറെ കണ്ട് അതിന് വേണ്ട ചികിത്സ തേടേണ്ടത് അനിവാര്യമാണ്.
Post a Comment