ബൈക്കില്‍ ഒറ്റയിരുപ്പില്‍ എത്രദൂരം പോകാം?

 

ഹ്രസ്വദൂര യാത്രകള്‍ക്കും ട്രാഫിക്കില്‍ എളുപ്പത്തില്‍ ഓടിച്ചു പോകാമെന്നതിനാലുമാണ് ഇന്ത്യയില്‍ കൂടുതല്‍ ആളുകളും ബൈക്കുകള്‍ ഇഷ്ടപ്പെടാന്‍ കാരണം. ദീര്‍ഘദൂര യാത്രകള്‍ക്കായി രൂപകല്‍പ്പന ചെയ്ത ക്രൂയിസര്‍ ബൈക്കുകള്‍ ഇന്ന് ഇന്ത്യയില്‍ നന്നായി വില്‍ക്കപ്പെടുന്നുണ്ട്. കാറുകള്‍പോലെ ദീര്‍ഘദൂരം സഞ്ചരിക്കാന്‍ സാധിക്കുന്ന തരത്തിലാണ് ഇതിന്റെ ഡിസൈനും മെക്കാനിക്കല്‍ പാര്‍ട്ട്‌സുകളും രൂപപ്പെടുത്തിയെടുത്തിരിക്കുന്നത്. എന്നാല്‍, ഹ്രസ്വദൂരം താണ്ടാനായി നമ്മള്‍ പൊതുവേ ഉപയോഗിക്കുന്ന കമ്മ്യൂട്ടര്‍ ബൈക്കുകളില്‍ ലോങ്ട്രിപ്പ് പോകുമ്പോള്‍ ഒരു ദിവസം എത്രദൂരം താണ്ടാമെന്നത് സംബന്ധിച്ച് പലര്‍ക്കും സംശയമുണ്ടാകും. 

റൈഡര്‍ക്കും ബൈക്കിന്റെ ശേഷിക്കുമനുസരിച്ച് ഈ കണക്കുകള്‍ വ്യത്യാസപ്പെട്ടിരിക്കും. ഇന്ന് 100 മുതല്‍ 150 സിസി വരെയുള്ള ബൈക്കുകളാണ് ഹ്രസ്വദൂര യാത്രകള്‍ക്ക് നമ്മള്‍ കൂടുതലായി ഉപയോഗിച്ചുവരുന്നത്. ചെറിയ എന്‍ജിന്‍ ശേഷിയിലുള്ള മോട്ടോര്‍ സൈക്കിളില്‍ ദീര്‍ഘദൂര യാത്രചെയ്യുമ്പോള്‍ ഒരുമണിക്കൂര്‍ അല്ലെങ്കില്‍ 50 കിലോമീറ്റര്‍ തുടര്‍ച്ചയായി ഓടിക്കാം. 50 കിലോമീറ്ററോ ഒരു മണിക്കൂറോ എതാണ് ആദ്യം വരുന്നതെങ്കില്‍ വാഹനം ഓഫാക്കി ഒന്ന് 'തണുപ്പിക്കാം'. 10 മിനിറ്റിന് ശേഷം യാത്രതുടരാം. 

ഇപ്പോള്‍ നാട്ടിലെ ഫ്രീക്കന്‍മാരുടെ കൈയില്‍ 150 മുതല്‍ 200 സിസി വരെ എന്‍ജിന്‍ കപ്പാസിറ്റിയുള്ള ബൈക്കുകള്‍ കൂടുതലായി കണ്ടുവരുന്നുണ്ട്. ഈ ശേഷിയിലുള്ള ബൈക്കുകളില്‍ ഒറ്റയിരുപ്പില്‍ തുടര്‍ച്ചയായി 100 കിലോമീറ്റര്‍ വരെ സഞ്ചരിക്കാമെന്നാണ് കണക്ക്. 100 കിലോമീറ്റര്‍ താണ്ടിയശേഷം ബൈക്കിന് ഒരു 10 മിനിറ്റ് വിശ്രമം കൊടുക്കണം. ഇടവേള എടുത്തശേഷം ബൈക്ക് സ്റ്റാര്‍ട്ട് ചെയ്ത് വീണ്ടും യാത്ര തുടരാം. ഇത്തരത്തില്‍ ഇടവേളകള്‍ എടുത്ത് ഒരു ദിവസം 400 മുതല്‍ 500 കിലോമീറ്റര്‍ വരെ യാത്രചെയ്യാവുന്നതാണ്. 

ഇനി 250 സിസിക്ക് മുകളിലുള്ള ഉയര്‍ന്ന എന്‍ജിന്‍ശേഷിയുള്ള വാഹനങ്ങളില്‍ നിങ്ങള്‍ക്ക് സ്വതന്ത്രമായി യാത്രചെയ്യാം. എന്നാല്‍, നിങ്ങളുടെ ശരീരത്തിന് വിശ്രമവും ഇടവേളകളും അത്യാവശ്യമാണെന്നകാര്യം മറക്കരുത്. അതിനാല്‍ ദീര്‍ഘദൂര യാത്രകളില്‍ ഇത്തരം ബൈക്കുകളിലും 100 കിലോമീറ്റര്‍ പിന്നിടുമ്പോള്‍ ചെറിയ ഇടവേളകള്‍ എടുക്കുന്നതാണ് നമ്മുടെ ശരീരത്തിന് എന്തുകൊണ്ടും നല്ലത്. എന്തുകൊണ്ടെന്നാല്‍ ദീര്‍ഘനേരം ഒരേപോലെ ബൈക്ക് ഓടിക്കുമ്പോള്‍ നടുവിനും പുറത്തിനും ഇടുപ്പിനും കാലിലും വേദനയെടുക്കാന്‍ സാധ്യതയുണ്ട്.

ഇക്കാര്യങ്ങള്‍ അനുഭവപ്പെട്ടാല്‍ നിങ്ങള്‍ക്ക് കംഫര്‍ട്ടായി യാത്രചെയ്യാന്‍ സാധിക്കുകയില്ല. അതുകൊണ്ട് ലോങ് ട്രിപ്പുകള്‍ നടത്തുമ്പോള്‍ ഇടയ്ക്ക് വിശ്രമിച്ച് യാത്ര തുടരുന്നതാണ് എന്തുകൊണ്ടും നല്ലത്. റൈഡറുടെ ശരീരത്തിന് മാത്രമല്ല വാഹനത്തിന്റെ ദീര്‍ഘായുസ്സിനും തുടര്‍ച്ചയായുള്ള ഓട്ടം ക്ഷീണം വരുത്തും. തുടര്‍ച്ചയായി ദീര്‍ഘദൂരം ഓടുമ്പോള്‍ എന്‍ജിന്‍ ചൂടാവാന്‍ സാധ്യതയുണ്ട്. അതിനാല്‍ ഓരോ 100 കിലോമീറ്റര്‍ പിന്നിടുമ്പോഴും ചെറിയ ഇടവേളയെടുത്ത് വിശ്രമിക്കണം.